يعنى إيه ليبرالية يعنى والدتك تبقى من غير حجاب!

إليكم المصطلحات المجعلصة اللى ظهرت على السطح اليومين دول واللى الناس بتتكلم فيها أو عنها.

نبدأ بالليبرالية: اشتقت كلمة ليبرالية من ليبر liber وهى كلمة لاتينية تعنى الحر، فالليبرالية تعنى التحرر، وهى حاليا مذهب أو حركة وعى اجتماعى سياسى داخل المجتمع، تهدف لتحرير الإنسان كفرد وكجماعة من القيود السلطوية الثلاثة (السياسية والاقتصادية والثقافية)، وهى نسبية إذ تختلف من مجتمع إلى مجتمع).

وبخصوص العلاقة بين الليبرالية والأخلاق، أو الليبرالية والدين، فإن الليبرالية لا تأبه لسلوك الفرد طالما أنه لم يخرج عن دائرته الخاصة من الحقوق والحريات.

وده ميمنعش إن المصطلح المجعلص ده ظهر له تفسير حديث مؤخرا قريب جدا هيتم ضمه لموسوعة ويكيبديا الشهيرة، وهى أن الليبرالية تعنى إن (أمك تبقى من غير حجاب). والتفسير ده تفسير الشيخ «حازم شومان» فى إحدى خطبه بالمساجد والفيديو موجود على اليوتيوب للى يحب يرجع له.. وهنا المفروض ننزل بلافتة لا تعليق.. وعلى المتلقى أنه يعلق بنفسه.

والمصطلح المجعلص ده هتسمعه كتير جداً فى خطب الجوامع فى الفترة اللى جاية بتحذر منه، وبتقولك أبعد عنه، ويمكن يوصل الحال إنه يتقال لما تعرف إن فلان ليبرالى متسلمش عليه ومتلمسوش وعامله معاملة مرضى الأمراض المعدية.

اليسار: هو عبارة عن مصطلح يمثل تياراً فكرياً وسياسياً يسعى لتغيير المجتمع إلى حالة أكثر مساواة بين أفراده ويرجع أصله للثورة الفرنسية وسبب التسميه هو أن بعض نواب البرلمان الفرنسى كانوا قاعدين ع الشمال أثناء طرح ومناقشة موضوعات زى التحول للجمهورية وإقرار العلمانية والتخلص من سيطرة الكنيسة.

وبمرور الوقت المصطلح بقى بيضم مصطلحات تانية زى ليبرالية، ديمقراطية واشتراكية.. كلها مصطلحات ممكن يتم التعامل معها اليسار.

والمصطلح المجعلص ده هتبقى تسمعه فى الأحزاب أو فى الكلام عن الأحزاب سواء الموجودة بالفعل أو بعض اللى لسه هتتولد بعد قانون الأحزاب الجديد، ومن الطبيعى أن المصطلح اللى بعد كده إنه يبقى عكس اليسار.

اليمين: وهو مصطلح بيتقال على بعض الراديكاليين «بزيادة» اللى مش بس عاوزين يتعاملوا بمنطلق الجذور لأ كمان بيرفضوا فكر اليسار رفضاً كلياً... واليمين فيه منه نوعان... نوع عادة.. وممكن إنه يتواجد من خلال أحزاب.. ونوع سوبر بيسموه دايما اليمين المتطرف لأنه بيؤمن بالعنف فى فرض وجهة النظر والسيطرة أو لفرض التقاليد والقيم وممارستها. وبقولك من دلوقتى متندهش لما تلاقى المصطلح المجعلص ده بيتقال على السلفيين فى الفترة الجاية بعد حوادث هنا وهناك منها حادث قطع أذن المواطن المصرى أيمن أنور مترى «تطبيقاً لحد وهمى وافتكاسى»، على حد قولهم.

وأخيرا ديمقراطية: تعنى فى الأصل حكم الشعب لنفسه، هى شكل من أشكال الحكم السياسى قائمٌ بالإجمال علَى التداول السلمى للسلطة وحكم الأكثريّة وكثيرا ما يتم خلطها بالليبرالية وعند الديمقراطية بالذات لازم يكون خير الكلام ما قل ودل.

والديمقراطية بالذات مش مصطلح مجعلص على الإطلاق... ولكن حلم بلدان وشعوب كتير.

ملحوظة أخيرة: تمت الاستعانة بوكيبديا (لسبر أغوار) الكلمات المجعلصة السابقة.. وطبعا سبر أغوار تتماشى مع كل المصطلحات الثقيلة اللى فاتت.